由奧斯卡金像導演趙婷執導，影迷期待已久嘅《永恆族（Eternals）》終於喺上禮拜正式上映，全球首周票房勁收1.617億美元，成為疫情期間全球首周票房第2高作品。不過齋計北美院線嘅話，首周成績就比《尚氣》及《黑寡婦》遜色，而且評價依然兩極。

據外媒THR報導，雖然《永恆族》北美首周票房「只有」7100萬美元，表現比《尚氣》以及採用戲院/串流平台同時上映嘅《黑寡婦》差，甚至係26部MCU電影入面北美首映成績最差嘅一部，不過海外成績就喜出望外，首周勁收9070萬美元票房，其中韓國更貢獻出1410萬票房成為最大嘅海外市場。

圖片截自：IMDb

先前同大家報導過，《永恆族》未正式上映之前，因劇情涉及LGBTQ+議題而被網民瘋狂負評，搞到影評網IMDb暫時關閉評分功能。隨住電影上映，嗰評分功能亦都再次開放，但反應依然非常兩極，其中唔少畀出1星評分嘅人都話因為套戲好悶，並非全然針對同性劇情。唔知各位已經睇咗嘅朋友，又覺得如何呢？