相信大家睇科幻片嗰陣都見過唔少巨型飛船，但實際有幾巨你又有冇概念呢？最近外媒The Verge就分享咗一個名為「Park My Spaceship」嘅有趣網站，玩家能夠將《星球大戰》、《星空奇遇記》、《2001太空漫遊》等經典飛船按比例覆蓋喺Google地圖，等大家可以實測一下啲飛船究竟有幾大，原來一部滅星艦（Star Destroyer）差唔多有成個灣仔咁大！

據了解，呢個網站早於2018年上線，只不過近排俾人拎返出嚟玩而hit返。大家可以喺網站選擇各種經典科幻作品嘅飛船，然後就會有一個按比例嘅圖示出現喺地圖，等各位能夠實測一下心儀嘅飛船究竟有幾大，會唔會大過住緊嗰區等等。網站收錄咗《星球大戰（Star Wars）》、《星空奇遇記（Star Trek）》、《天煞-地球反擊戰（Independence Day）》，《質量效應（Mass Effect）》等等多部經典飛船，有興趣嘅朋友可以去玩下。

中環摩天輪附近嘅空地就足夠細細隻嘅千歲鷹號（Millennium Falcon）降落。

赤鱲角機場跑道亦容不下一般嘅滅星艦（Star Destroyer）。

巨無霸版嘅滅星艦（Executor-class Super Star Destroyer）更加係大過成個港島。

至於死星（Death Star）就差唔多可以覆蓋整個日本九州。

除咗科幻作品之外，網站亦有真實飛行器，例如國際太空站嘅大小就同維園草地相若。