相信每一個機迷，都一定會聽過以核爆輻射末日世界觀聞名嘅《Fallout（異塵餘生）》系列，其獨特藝術風格以及精彩故事情節引人入勝，令玩家能夠體驗特獨嘅廢土生活。日前就有消息指呢部大作將於今年開拍真人電視劇，並由美劇《Westworld（西部世界）》主創Jonathan Nolan主理以及執導第一集！

據外媒Deadline報導，Amazon將於今年內開拍《Fallout》真人電視劇，並由《Westworld》主創夫妻檔Jonathan Nolan（P.S. Christopher Nolan弟弟）及Lisa Joy主理，前者更會執導埋第一集。考慮到《Westworld》同《Fallout》都有住相似嘅反烏托邦主題，相信成品應該唔差嘅！除此之外，《Captain Marvel》編劇Geneva Robertson-Dworet，以及HBO劇集《Silicon Valley 》編劇之一嘅Graham Wagner亦都擔任節目統籌（Showrunner）。

《Fallout》最早由Black Isle Studios製作，直到第三集起改由Bethesda製作並發行，雖然每集劇情都唔一樣，不過背景同世界觀都係大同小異，講述平行時空下嘅世界發生核戰，除咗成功進入地下避難所嘅人能夠躲過一切，地上大部份生物都滅絕或因輻射而變種，所以廢土上會充斥住有兩個頭嘅牛、超巨型曱甴、屍鬼等變異怪物。玩家將會扮演一位原本喺避難所生活嘅人類，但基於某啲原因而必需走出避難所，踏上危險四伏嘅廢土展開一場冒險。暫時未知劇集會改編自邊一集遊戲，官方亦未公布演員名單，不過呢個消息足以令Fans們非常期待。