射橡筋乃係每個男仔細個時——呃，依家啲小朋友我唔知啦，但至少我嗰代人係——必玩嘅玩具，由最陽春嘅用手射、到花巧啲嘅用手指整槍，如果你能夠拎出一把用木筷子或雪條棍整出黎嘅橡筋槍，你就即刻會成為整班朋友中最有型嗰個。不過黎到幾廿年後嘅今日，單發嘅橡筋槍已經唔夠型。要型，就要呢把用3D打印整出黎、可以連發可以換彈嘅橡筋槍！

呢把橡筋槍由日本火電製品設計，所有部件都係用3D打印整出黎，主要就分為槍身已經彈夾兩大部份。每個彈夾可以7發橡筋彈，裝好後由下方插入橡筋槍本體，將槍枝上方嘅推桿推前就可以完成上彈，再扣動扳機就可以發射，而且可以連射7發。要換彈時只需按下槍側嘅換彈掣，推桿就會回到原位，再從下方拔出彈夾則可。加埋上彈、換彈時嘅「咔嚓」聲，成件事幾咁中二幾咁型呀！

不過型，係要付出代價嘅。呢把3D打印橡筋槍連三個彈夾賣成8,000Yen，即係近$550港紙，以一把玩具槍黎講都真係幾貴。但你又唔好話呀，火電製品個官網上顯示把槍買到斷咗貨架啦！

資料來源：火電製品