距離科技驚悚片《Black Mirror》第五季播出將近3年，最近終於有新消息傳出喇！唔知新一季會唔會加入好多有關「疫情」嘅元素呢？

據外媒《Variety》引述知情人士報導，Netflix正籌拍全新一季《Black Mirror》，目前已經進入選角階段。雖然故事細節仍處於保密狀態，但爆料人就話新一季更具電影感，每集都當成單獨電影咁拍、時長超過60分鐘，而且集數亦會比只有3集嘅第五季更多，換言之第六季將會有4集或以上。

由Charlie Brooker創作嘅獨立單元劇《Black Mirror》，憑住諷刺人類過度依賴科技嘅超現實荒誕劇情，自2011年於英國Channel 4首播後大受歡迎，第三季起更成為Netflix旗下作品，可惜轉手後評價就一季不如一季，唔知第六季可唔可以再為觀眾帶嚟驚喜呢？