除咗高達之外，其實仲有其他機械人動畫都有將作品中嘅機械人作一比一實體化。例如《機動警察》中嘅英格倫，早於2014年左右就已經不定期出現於日本街頭。不過自從疫情開始，呢隻一比一英格倫就處於被閒置嘅狀態，近日Genco就發起眾籌，籌集修復資金，結果用咗一日就完成目標，一比一英格倫將於2月再次展出。

卻說1988年開始播出嘅《機動警察》將於今年迎來35週年，Genco除咗會製作新動畫《機動警察EZY》之外，仲有意於日本各地舉行各種活動，當中就包括再次展出一比一英格倫。佢由於疫情影響，部英格倫自2019年秋天後就一直處於閒置狀態，超過三年時間令英格倫除咗污糟之外，仲出現金屬部件老化、破損等情況。所以Genco於去年尾就發起眾籌，希望籌到300萬日元作為修復英格倫嘅費用。

出乎意料嘅係，Fans們非常支持修復計劃，只係用咗一日就已經完成咗300萬日元嘅目標，到撰文時已經籌得超過850萬Yen。而修復後嘅英格倫，就會於2月12日舉行嘅「Wonder Festival 2023冬」中嘅「第一回幕張國際Labor Show」中再次展示。如果大家都係《機動警察》嘅Fans，或者都可以為修復英格倫出一分力。

資料來源：Ubgoe