由HBO製作、改編自同名遊戲嘅劇集《The Last of US (TLoU)》自開播以來無論收視、口碑都衝破天際，大有問鼎本年度「神劇」嘅潛力，更早早宣佈會繼續將遊戲第二集改編成劇集第二季。而遊戲開發人兼劇集製作人Neil Druckmann日前就於Twitter公佈《TLoU》第二季嘅首張前導開報，當中出現咗一隻令無數玩家心碎又噁心嘅手臂。

No TLoU on HBO tonight. But Season 2 is already on its way! Endure & survive! pic.twitter.com/87bKKCDBeO

— Neil Druckmann (@Neil_Druckmann) March 19, 2023

如果你有留意遊戲新聞，相信都會知道2020年《TLoU 2》遊戲推出後，因為安排前作主角、深受大家愛戴嘅Joel被人用高爾夫球棍一棍打死，然後再要玩家控制「殺人兇手」Abby進行遊戲，到後段先再用回Ellie尋仇，但當大仇終將得報時又安排Ellie突然大愛放下屠刀，結果引起眾怒。不單Metacritic上嘅玩家評分一度跌到3.4 (目前為5.8)，更令玩家質疑一眾於遊戲開售前畀出十分滿分嘅一眾遊戲媒體，引起軒然大波。

而前導海報中呢隻非常粗壯，皮膚白晢仲拎住個槌仔嘅，相信就係Abby嘅手臂。

值得一提嘅係，製作人Neil Druckmann早前就確定，《TLoU》劇集第二季唔會有「重大改編」，頂都盡都如劇集第一季一樣對部份劇情作出刪減或增補，劇情走向不會偏離遊戲。換言之，Joel嘅死、Abby嘅出場、Ellie最後放棄復仇等重要劇情都應該會於劇集保留。

不過亦有唔少網民指出，如果當初遊戲係將Abby嘅部份放於開首，令玩家有足夠時間代入角色，然後先發生「喬爾夫球」事件，再轉用Ellie尋仇，整件事會容易接受得多。唔知劇集又會唔會向呢個方向改編？定係會再一次挑戰觀眾嘅容忍程度？