外國有種搵錢方法叫「flipping」，簡單黎講就即係去二手市場低價「尋寶」，然後再高價轉售。要做到呢個效果，你當然要有一定嘅相關知識，又或者你可以好似美國一位婦人咁，用絕佳嘅運氣，將30蚊變成200萬！

圖片：Bonhams Skinner

話說美國拍賣行Bonhams Skinner近日將會拍賣一幅美國畫家Newell Convers Wyeth於1939年創作嘅《Romano》，畫作當年係作為某本小說嘅插圖而設計，最終亦真係有印入本書到，但幅原畫就一直不知所蹤。直到今年初，修畫師Lauren Lewis突然於一個有幾萬名網民嘅「Things Found in Walls」FB群組中，見到有人上傳咗《Romano》嘅照片，表示自己喺屋企搵到呢幅畫，仲問：「係咪真貨？」於是Lauren Lewis就即刻揸車去搵嗰名網友，更確認幅畫就係《Romano》原圖，連個畫框都係當年Wyeth親自揀嘅。

圖片：Bonhams Skinner

原來該名網民係一個完全唔識得藝術嘅普通婦人，而幅畫就係佢於2017年喺波士頓附近一間二手店貪得意用4美金 (約HK$32) 買下，掛咗喺睡房幾年之後就塞咗入櫃，到近日無意中搵返出黎先Post上FB同大家分享下。而拍賣行驗證後，確認該畫作係Wyeth嘅真跡，目前預計拍賣價為25萬美金 (約HK$196萬)，換言之該名婦人嘅4蚊美金翻咗62,500倍。

此前藝術學者們只能確定Wyeth曾於1939年創作《Romano》，但對於畫作嘅大小、去向全然不知。目前亦唔知道呢幅於2017年出現於二手店之前究竟經歷過咩事。

資料來源：Insider