為免浪費金錢同時間，唔少人都會根據套戲或劇集嘅評分嚟決定是否觀看，其中又以影評網站Rotten Tomatoes（爛番茄）最受歡迎。不過，最近有美媒爆料，曾有電影公關公司出錢「聘請」影評人唱好作品，藉此操控爛番茄評分。

Rotten Tomatoes上嘅評分主要分為Tomatometer（又名新鮮度）及Audience Score（又名觀眾評分或爆米花指數）兩個分數。Tomatometer由專業影評人打分所決定，影評人只能夠交出Fresh或Rotten兩種評價，分別代表推薦及不推薦，系統會根據Fresh嘅比例計算出一個百分比，超過60%就會顯示一個新鮮紅番茄標誌，反之就係一個綠色爛蕃茄。至於Audience Score方面，顧名意義係由觀眾打分決定，觀眾可以交出1-5星嘅評價，最後系統會根據打出3.5星以上嘅觀眾比例作為Audience Score。

回到正題，最近外媒《Vulture》爆料，一間名為「Bunker 15」嘅公關公司曾於2018年以一篇50美元或更高價作酬勞，聘請一啲名不經傳嘅影評人於Rotten Tomatoes撰寫好評，甚至遊說已交出負評（Rotten）嘅影評人轉軚：「如果你想改做好評（Fresh），我識得Rotten Tomatoes嘅編輯，可以幫你改返加喎。」經過一系列暗黑操作後，Bunker 15成功令一部莎士比亞作品改編電影《Ophelia》新鮮度從40%提升至62%，從「綠色爛蕃茄」變成「新鮮紅番茄」標誌，原本未搵到發行商嘅《Ophelia》亦喺一個月後被IFC Films接下美國發行工作。

《Ophelia》劇照

Bunker 15嘅行為曝光後，Rotten Tomatoes隨即將有關評論刪除，並向涉事影評人作出嚴正警告，強調網站非常重視評分嘅公信度，絕不能容忍任何操控評分嘅行為，而且有專責團隊定期監測及調整平台可疑活動。