Microsoft因收購Activision Blizzard遭美國聯邦貿易委員會（FTC）調查，唔少遊戲內幕因而曝光。據最新流出文件顯示，Microsoft正計劃於明年年底推出代號為「Brooklin」嘅無光碟機新款Xbox Series X，以及代號為「Ellewood」嘅新款Xbox Series S，而且兩款新機都唔會加價，售價依舊為499及299美元。

文件指出，新版Xbox Series X將改為圓筒形設計，不再配備光碟機，但內存容量將從1TB升級為2TB，正面底部有一個USB-C接口，並新增支援Wi-Fi 6E及藍牙5.2，處理器亦由7nm製程變成6nm，功耗因此而下降15％，但遊戲效能並冇提升。而新版Xbox Series S就沿用舊有外觀設計，內存容量從512GB提升至1TB，並新增支援Wi-Fi 6E及藍牙5.2。

除此之外，兩款新Xbox都會配備代號名為「Sebile」嘅新版Xbox手掣，採用白黑雙色設計，支援Xbox Wireless 2連線及藍牙5.2，同時內建陀螺儀及觸覺回饋組件。