曾經有人講過自己可以「扛200斤麥子，十里山路不換肩」，唔少網民都認為呢個說法極為誇張，根本就唔可信。不過近日日本X (Twitter) 上就有人分享咗一個源自江戶時代嘅「行路方法」，當中就有提到只要落山時舉高雙手黎行，就能有效減輕負擔及體力消耗，仲有人親身驗證過話真係有用！莫非真係可以「十里山路不換肩」？

話說擁有包括「五十嵐剛 【忍道】陰忍師範（五段）」等多個銜頭嘅日本忍道家「習志野青龍窟 (@3618Tekubi)」，日前於X上分享咗佢於日本江戶時代書籍「万民千里善歩傳」搵到嘅「落山步法 (下り坂運歩法)」，仲拍片實試其功效。片中可見「習志野青龍窟」慢跑下坡，同時將雙手高舉過頭，並隨住每一步落地時微微向上提。

據佢指，呢個行路方法雖然睇落非常滑稽，但高舉雙手後的確能夠抵銷部份下坡時嘅衝擊力，減輕腳掌同膝頭嘅負擔，令下坡路更為輕鬆、行得更快，係一個值得大家考慮嘅下坡方法。不過佢後來亦補充，關鍵在於要將落地時嘅衝擊力透過肩胛骨傳到雙手，如果只係自己用力舉手或者節奏感唔好，就未必感受到功效，所以係需要練過下先用到。

片段一發佈就引來大量網民討論，而且唔少人都表示江戶時代嘅古人經常要徒步負重攀山涉水，「万民千里善歩傳」就係整合咗佢哋多年黎嘅「行路訣竅」，所以似乎頗為可信，甚至有網民親身試過後表示真係有用。

另外「習志野青龍窟」後來亦分享咗「上山步法 (上り坂運歩法)」，基本就係「落山步法」嘅相反，個人稍微坐低，雙手於身體兩旁向下伸，似乎就係將身體重心壓低以達到慳力嘅效果，睇落亦有幾分似「Naruto跑」。

另外「習志野青龍窟」曾於2021年接受日本傳媒訪問，除咗親身示範「下り坂運歩法」及「上り坂運歩法」外，仲有平路用嘅「三ツ足運步之法」。當時報導指用咗呢啲步法可以一日行160km，即約40里。咁「十里山路」都唔算太誇張呀？