自今年6月發生「泰坦號潛水器事故」後，由於事件嘅戲劇性，以及當時傳媒鋪天蓋地嘅報導、網民嘅無情嘲諷，所以件事都未正式作結，就已經有人猜測荷里活一定會將事故改編成電影，甚至一度有傳《Titanic》導演James Cameron會執導，搞到佢要發文澄清及駁斥。而經過三個月嘅「傳聞」之後，終於有片商公佈會開拍與事故相關嘅首部電影，而其做法更可以話係將事故嘅價值「榨乾榨淨」。

據《Deadline》報導，美國片商MindRiot日前公佈將會開拍改編自「泰坦號事故」、暫名《Salvaged (打撈)》嘅電影。電影劇本會由MindRiot嘅Justin MacGregor以及Jonathan Keasey負責，導演則由美國黑人喜劇系列《Black-ish》嘅監製之一E. Brian Dobbins擔任。《Deadline》指出《Salvaged》會涵蓋泰坦號事故發生前、發生期間以及發生後嘅故事，而編劇之一嘅Jonathan Keasey表示：「事故是錯誤訊息、急功近利的又一次例證，這次是我們不間斷、全天候的媒體報導，在未有正確程序下審判及催毀其他人的生活。電影不單紀念事故中的人以及他們的家人，更會作為載體、宏觀地點出對目前媒體本質的擔憂。」

E. Brian Dobbins (左)

有趣嘅係，雖然MindRiot講到電影非常「高大上」，但佢哋對於「泰坦號事故」嘅利用方式亦可以話係「榨乾榨淨」。事關9月時MindRiot已經宣佈會開拍一部關於事故嘅紀錄片，而紀錄片嘅名稱同樣係《Salvaged》，亦即MindRiot於一個月內，宣佈會用一件事、同一個名，分別開拍一部紀錄片再加一部電影，直頭就係「一雞兩味」嘅字典解釋。至於紀錄片及電影能否達到佢哋提出嘅「批評媒體」目的，睇黎就要等到作品見街先能判斷。

資料來源：Deadline