Rockstar Games如無意外將於12月推出《GTA 6》首部預告，引發全球機迷熱切期待，但售價好有可能會貴過前作唔少！

Rockstar Games母公司Take-Two Interactive執行長Strauss Zelnick日前於財報電話會議上提到，買斷制遊戲應該按該遊戲能夠提供嘅遊玩時數而定價，換言之隻Game愈耐玩、愈多內容，就應該賣得愈貴：「決定任何娛樂產品售價時，基本上都係依據該作品所帶嚟嘅娛樂價值計算，例如每小時價格乘以預期享用時數，最後加上顧客對該作品期望嘅最終價值。因為客人係買斷該作品，而非租借或訂閱。」

按照呢套邏輯，Strauss Zelnick就認為公司旗下嘅遊戲實在賣得太過便宜，事關《GTA》《Red Dead Redemption》等系列閒閒地都可以玩超過100小時，例如以《GTA 5》售價60美元、可遊玩時數為60小時計算，咁每小時價格只需1美元，的確非常抵玩。不過Strauss Zelnick亦補充，佢咁講唔代表遊戲業界期望加價或具有定價能力，而係指出買Game對玩家嚟講係一件性價比好高嘅交易。

對此，網民就唔太認同呢種計算方法，指出娛樂效果難以量化，好難去定每小時遊玩時間應該值幾錢。再者，如果玩家覺得遊戲內容冗長沉重，玩唔足鐘又應該點計，係咪要回水？除此之外，有網民就表示隻Game如果好玩，就算遊戲內容少、可提供遊玩時數短，佢都願意埋單。

隨著近年各大廠商將3A大作定價從60美元提升至70美元，加上T2 CEO獨到嘅見解，可以預視到《GTA 6》正式問世時應該會前作貴出唔少，唔知大家又接受到《GTA 6》最貴賣幾多錢呢？