Nike 同 Sacai 嘅 Crossover 鞋款系列有幾搶手我相信唔需要多講，以「雙剔」為一大賣點嘅鞋款又再次回歸！而最新一對 Nike Crossover Sacai 仲搵埋設計師 Jean paul gaultier 合作，發表嘅新鞋仲加入咗代表一代人回憶嘅「woven 編織」設計。

最新嘅 Nike X Sacai X Jean paul gaultier 聯乘鞋款就延續咗 Sacai 先前幾次對於 Nike 經典嘅 LDV 同 Daybreak 鞋款，加上「雙剔」同加長中底長度等解構性設計，而今次嘅Crossover系列仲以 Woven 編織技術打造鞋面，令鞋面睇落更具前衛性之餘，亦勾起一代男士嘅「Woven回憶」。

一提起Nike Woven 嘅編織技術，好多男士都會記得大約係十年前 Woven 係唔少人心目中嘅「鞋王」。之不過 Woven 技術有咩咁特別？其實 Nike Air Woven 早喺2000年已經出現，當時設計師 Mike Aveni 參考咗古時候以尼龍線編織而成，唔需要剪裁同縫紉，輕身又貼合腳面嘅草席涼鞋，繼而設計出 Nike Air Woven 波鞋，只不過呢批鞋剛剛登場時因為沉悶嘅顏色令Woven 鞋款並不太受歡迎。

到咗 2002年，日本潮流教父藤原浩重新設計呢對鞋，佢巧妙地以多種不同顏色嘅條子編織出「彩虹色」嘅 Woven，大大提高鞋款嘅吸引度同視覺效果，獨特外形，加上當時有陳冠希同Bill Murray 等名人嘅加持之下，奠定咗 Air Woven 係潮流界嘅鞋王地位。

今次 Nike X Sacai X Jean paul gaultier 聯乘系列增添嘅 woven 編織設計，令鞋款有更多變化之餘，仲勾起一代人嘅「編織回憶」，唔知有幾多人會因為對 Woven 嘅情意結，而入手呢對鞋款呢？