Sony漫威宇宙（SMU）最新作《Madame Web（蜘蛛夫人）》於上周情人節正式開畫，雖然集結Dakota Johnson及Sydney Sweeney兩大火辣女星，但都未能吸引大量影迷入場支持，北美首周票房僅進帳2,580美元，而全球首周票房則為5,150美元。而且除咗票房仆直，口碑亦非常慘烈，電影目前於影評網站「爛番茄」（Rotten Tomatoes）分別獲得13%新鮮度及55%影迷評分，評價仲差過2022年嘅《Morbius（魔比斯）》。考慮到電影製作成本為8,000萬美元，加上宣傳費用及戲院分成，相信要達到收支平衡都有一定難度。

相對之下，同日於2月14日情人節上映，以「雷鬼之父」Bob Marley生平為藍本嘅傳記電影《Bob Marley: One Love（音樂傳奇卜馬利：人生愛與夢）》就十分賣座，北美首周票房進帳5,100萬美元，全球首周票房更高達8,000萬美元，並於「爛番茄」（Rotten Tomatoes）分別獲得41%新鮮度及93%影迷評分，換言之又係一部觀眾鍾意，但影評人就覺得一般嘅電影，但票房口碑均遠遠拋離《Madame Web》。

翻查資料，Sony漫威宇宙下部作品《Kraven The Hunter（狂獸獵人格力文）》將於今年8月底上映，由Aaron Taylor-Johnson主演，同時亦係SMU首部R級電影，唔知到時成績又會如何呢？