由士郎正宗創作嘅經典科幻漫畫《攻殼機動隊》，以出色劇情及對哲學概念深入探討廣受好評，更被封為cyberpunk經典代表作，歷年嚟曾多次改編成動畫及真人版電影。如今官方宣布將於明年推出全新改編電視動畫，由《犬王》製作公司Science SARU操刀。

《攻殼機動隊》以2040年代虛構日本城市新濱市為背景，講述經過第三及第四次世界大戰洗禮後人類科技突飛猛進，除咗大腦以外嘅器官都可以透過電子義體取代，而大腦亦可以改裝成能夠連接網絡嘅電子腦。雖然人類全面義體化讓生活變得更加便利，但同時催生出各式各樣嘅電子犯罪，於是政府成立了「公安九課」（亦即係攻殼機動隊）以應對新興犯罪。

從官方宣傳片可見好多由原作漫畫構成嘅畫面，似乎暗示緊呢部新作將會更加忠於原著改編，對原作黨嚟講絕對係一大喜訊。至於導演是誰仍有待官方後續公布。