作為日本最「不務正業」嘅公司之一，日清過去已經為「日清杯麵」出過無數咁多款惡搞週邊，但佢哋創意似乎仍然源源不絕。近日佢哋就為「杯麵任務2」，推出一系列新嘅惡搞週邊，有啲好笑得黎仲幾吸引添呀！

所謂「杯麵任務」其實係日清舉行嘅促銷活動，簡單黎講就係購買有特別包裝嘅杯麵就可以掃Code儲分，然後用分去換限量週邊。而個重點當然就係究竟有咩週邊畀你換！例如儲夠兩分，就以下「杯麵便當盒」、「杯麵揭蓋地氈」、「杯麵睡袋」以及「謎之鰻魚」同「國產黑毛和牛」兩款食材。其中最有趣嘅大概係「杯麵睡袋」，事關圖中對手同個杯麵係印喺個睡袋上面，但我睇咗兩次先睇得清。

而6分可換嘅週邊中，就包括「日清牌」、「Jackall監修釣魚假餌」、「New Era聯乘Cap帽及T恤」，以及「伊勢龍蝦」。其中「日清牌」其實即係一副麻雀，但萬子就換咗「麵子」、索子就變成麵條，「東南西北」更加變咗做「日清杯麵」，你話食出「雙番杯自摸9麵」都幾好笑。

12分可換嘅，就有同Razer聯乘嘅「謎肉電競鍵盤」，倒瀉杯麵造型嘅地拖，以及一年份嘅杯麵套裝。24分入面就有杯麵造型嘅焚火台、與JBL聯乘嘅特別版藍芽喇叭，以及我都唔知咩情況會用得著嘅超大杯麵帽。

至於36分先換到嘅就有全息投影虛擬管家「Gatebox」日清特別版，以及一個杯麵浴筒。兩者不約而同都係換到都唔知放邊嘅。

資料來源：日清