{ SKIP }
文:李羅渣  
POSTED ON 15 Jun 2016

圖片:UEFA


前晚歐國盃上屆冠軍西班牙俾一致睇好可以輕取捷克,加埋曼聯門將迪基亞終於擔正,好多球迷都好期待。不過有睇場波嘅Gentlemen都會睇到西班牙就算小勝一球,表現都相當唔對辦,當然捷克本身防守都非常穩陣,加埋有門神施治坐鎮西班牙要搵食的確唔易,但都無話咁甩皮甩骨架?淨係睇今場,我諗好多狂牛迷都會擔心衛冕之路點行落去。


圖片:Metro


西班牙最被外界垢病係戰術仍然停留喺控球至上嘅時代,今屆李斯特城嘅成功,就已經同世界講,控球都唔一定係贏波嘅條件。當然西班牙嘅控球打法比今季曼聯高效好多,仍然係向前傳,只係西班牙喺創造攻勢時都太過迂迴,明明已經可以起腳,但硬係要控多兩控,到起腳時捷克嘅後防已經封到,甚至偷埋你波打反擊,好彩捷克成場有威脅攻勢唔多加埋迪基亞靠得住先無事。而莫拉達機會雖然多,但呢場射門決定唔夠果斷同冷靜,搞到好多時都益晒捷克後防同埋施治。


圖片:Topsoccer


而正選上面有兩個球員絕對抵打籮柚,一個係打緊切爾達嘅左翼鋒勞列圖,勞列圖同華迪一樣都係大器晚成嘅球員,前年先入選國家隊,雖然今年有四個國家隊入球,不過今場成日越位,一係就甩波,明顯大賽經驗不足,斷送咗西班牙唔少機會;另一個一定係法比加斯,當然佢就有少少關迪保斯基事,佢喺車路士本身係打後一格位置,但已經有恩尼斯達喺度,只好俾佢打攻擊中場,但表現就令人相當失望,除咗一次關鍵傳送就無貢獻其他嘢。同樣位置,就有高基同艾簡達拿打到,但更適合嘅伊斯高同馬達都無入選,如果西班牙有乜三長兩短,喺人選上迪保斯基又會俾人清算。


圖片:The Guardian


西班牙身處D組仲有克羅地亞同土耳其,出線雖然唔難但面對呢兩隊西班牙都唔會好過,人選就無得搞架啦,但係有啲位置就可以用過其他人去打正選,甚至轉轉打法,中場位置西班牙水準仍然好高,只係面對啲中場活力好嘅球隊,西班牙就有啲吃力,睇下迪保斯基下輪會唔會有計仔啦。

李羅渣 (facebook page: https://www.facebook.com/leerogerfcpage/)

 

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青。


繼《超級瑪利歐兄弟大電影》大獲成功及《薩爾達傳說》真人版電影計劃公開後,任天堂並無打算停低腳步,正準備將更多經典角色搬上大銀幕! 據外媒《IGN》報導,任天堂同環球影業最近為一部名為《Untitled Do ...
hobby
【影視】大金剛有望登陸大銀幕擔正主角?任天堂與環球影業註冊《Donkey Kong》電影項目
15 Jul 2025
《龍珠》嘅歷史悠久,代表相關嘅衍生作品,例如遊戲亦非常多。如果你一個Fans,或者會覺得要同時追N隻Game有啲麻煩,但有好多隻Game就同時亦代表有好多「週年紀念」及相關官方活動。好似近日《龍珠》嘅官方X繼今年2 ...
hobby
【動漫】龍珠手遊7週年 官方X抽悟空及菲利衣裝
15 Jul 2025