不經不覺，十月嚟到最後衝刺階段，亦係嚟到慶祝萬聖節嘅時間。雖然同一樣身處年尾嘅聖誕節比起上嚟，街上嘅節日氣氛比較無咁強烈，但係喺香港都有好多萬聖節好去處嘅。

除咗最例牌嘅海洋公園哈囉喂同埋迪士尼呢啲主題樂園嘅萬聖節活動外，仲有遠近馳名，無論係西洋人定亞洲人嚟到香港都會走兩轉嘅蘭桂坊啦。雖然咩節日蘭桂坊都會有各大小活動去慶祝，但唔少人都覺得 Halloween 係最癲最放嘅 Moment 。

至於如果大家好似我咁無咩朋友又唔係好 Out-going 嘅，又想做啲嘢應吓節嘅話，可以學吓我咁買吓啲應到節又用得著嘅萬聖節商品，例如 A Bathing Ape 每年緊係會喺萬聖節出一兩件限定Tee，想平啲又多款嘅又可以睇吓我之前介紹過嘅 Chinatown Market 推出嘅萬聖節系列 。

【美式啜核】Chinatown Market 推出限定 Halloween T-shirt 系列

嫌衫褲太過 Seasonal，著得一次半次？唔驚！波鞋睇怕一年四季都啱啦啩。以下呢兩對波鞋都預定喺萬聖節當日發售，雖然分別出於 Nike 同 Puma 嘅出品，但其兩對波鞋設計概念都如出一轍地十分「露骨」。

呢個「露骨」實為字面上嘅露骨，真係骨嗰隻骨呀！兩對都以 X-Ray 透視下嘅腳骨構造作設計概念。Nike就以經典鞋款 Air Force I 呈現。Air Force 1 “Skeletal Force” 鞋款以白色作主調，鞋側則 Print 上 X-Ray 透視下嘅腳骨圖，同時鞋墊亦有同樣 Concept 作印花，另外加上夜光鞋身及珍珠色半透鞋底作點綴，細節位加分。

至於另一對 Puma Clyde Court 則為 2018 年推出嘅新籃球鞋款，Clyde Court "X-Ray"同樣於鞋身印上 X-Ray 透視下嘅腳骨圖，但有別之處則為無論你側視或俯視都可以見到其腳骨 Print，而且鞋身係以黑色作主調，同時鞋帶以橙色作設計夠哂 Sharp 醒，而本身呢對新鞋型更搭配襪套式Knit 鞋面，中底更以新型嘅球體避震系統打造，舒適度方面亦有保障。

最重要嘅一點，點買呀講咁多嘢...

日期方面上面就講咗啦，萬聖節當日十月三十一號發售；至於香港舖頭有無得買？未有聲氣但兩大品牌嘅美國官網都有賣，有心買其實唔難，我自己就 Mark 實咗對 Air Force 1 “Skeletal Force” 嘞。