全球首富Elon Musk收購Twitter一事仲未完成，但呀首富日前就已經與Twitter員進行首次「員工大會 (All-hands)」，並回答Twitter員工們事先提交嘅問題。其中佢就讚揚Twitter員工「做得好好」，並且指佢哋可以繼續Work From Home——應該？

早前我哋都有報導過，Elon Musk向Tesla高層們發出內部電郵，指除非佢哋「每星期喺office做足40個鐘」，否則唔可以再遙距工作，唔係就會炒咗佢；另一邊廂，Twitter於Elon Musk提出收購之前，就已經向員工承諾未來可以選擇無限期在家工作，亦即與Elon Musk嘅偏好不同。而當被問到Twitter員工於收購後能否繼續在家工作，Elon Musk就回應：「如果某個人只可以遙距工作，而佢哋係重要嘅，咁我冇理由炒佢哋」，算係某程度上保障Twitter員工繼續在家工作嘅權利。但Elon Musk同時亦強調，佢個人係「強烈偏好」大家返Office做嘢，而且會向主管們確認要求在家工作嘅員工對公司係有正面貢獻嘅。

圖片：Verge

員工大會上Elon Musk亦被問到點樣帶領Twitter達到10億用家嘅目標，而Elon Musk就認為Twitter應該要學Wechat，「喺中國你冇Wechat基本上就生活唔到，如果Twitter都做到類似嘅嘢我哋就好成功啦！」同時佢又指Twitter要向TikTok「唔悶嘅演算法」學習，認為Twitter都可以一樣咁「有趣」，同時「可以更好地將重要事件通知大家」。