唔知點解，見到張圖就覺得好match「令女生幻想破滅」呢句嘢，你睇佢個斷氣樣，科科。

好～入返正題先，好多時男仔都唔覺女仔咁玻璃心，以為自己靚仔有錢有taste就大L晒，囡囡一定會冧爆自己，殊不知原來家下啲女仔聽到粗口就會打冷震，咁都不特只，如果你講埋以下幾句說話，佢哋仲會因為FF破滅而怒反（你）白眼！

日本有網站就搵咗各個年齡層嘅女仔做調查，睇下「令女仔幻滅嘅男生發言」有邊幾句，發覺好多女仔都好討厭男仔約會時講以下說話，本身有好感都即刻反感！點呀？係咪好緊張先？係咪好擔心自己都講過出口先？唔好諗住令人幻滅嘅說話有幾惡毒，其實好多都係小事……

先嚟第5位「好想去你屋企……」
如果一知道個女仔自己一個人住，就向對方提出想去佢屋企，咁好明顯睇得出你有咩居心啦，咁明張目膽表露獸性嘅一面，好難叫個女仔buy你喎。（擺明逢場作戲或者一夜情就例外啦）

第4位　「等我搵搵張coupon先？」
慳家其實係好事，但首先你唔係個女仔嘅老公，慳咗嘅錢都唔關佢事，同埋男人老狗要個waiter/收銀望住你搵coupon，喺女仔眼中會係好唔得體嘅行為，慳家即刻變小家，仲要係約會期間慳得一蚊得一蚊，條女應該心諗︰嗰十幾蚊不如我幫你畀埋佢啦（內心反白眼）。

第3位　說話用字好老派
由細到大身邊都有啲男仔好鍾意扮大俠或者古惑仔咁講嘢，同佢哋一齊好似入咗第二個時空咁，係差在未講文言文。雖然男仔之間好似覺得咁嘅說話方式好funny，但對女仔而言，應該會心諗︰你做乜＿嘢呀？

第2位 「可以錫你嗎？」
哇！呢個Mean娜真係有嘢分享，上面嘅case我冇咩經驗，不過呢個我有喎！日本妹覺得被對方問「可以錫你嗎？」好唔man好尷尬，唔知yes好定no好，Mean娜試過仲尷尬呀！係「你可唔可以錫我呀？」，係個男仔問我︰「你可唔可以錫我呀？」做咩啫你！你教少女如我情何以堪呢！

第1位 「不如我哋AA制」
呢樣嘢都聽唔少，男方一講到AA制實畀人小，奈何好多女仔都覺得，男仔約自己出街，自己肯赴約對方已經要覺得好榮幸，仲要自己畀錢嘅話？條仔都太唔畀面自己了吧？

雖然現實好可悲，只能夠說，今時今日媾女係咁上下，希望各位巴打會搵到願意同你哋AA嘅好女仔。