以往一遇到打風、紅雨黑雨，唔少人第一個諗法就約Friend打牌。但大家都知依家「500年一遇」可以黎得有幾密，一個唔該遇著「局部積水」其實都幾危險架嘛。咁你話有冇方法可以安座家中，但又能夠同朋友大戰300圈呢？答案當然有，就係預期於今年內於Steam上推出嘅「手動麻雀 (手積み麻雀)」！

物理演算搭載、準備から何から全部プレイヤーがやるリアルタイムオンライン麻雀『手積み麻雀』Steamにて2023年内配信

ある意味もっともリアルな麻雀ゲーム現る。各種変則ルール・特殊役を採用し、自由にルールのカスタマイズが可能。

https://t.co/O9p6YwoOTL pic.twitter.com/NGUuqG8KoM

— ファミ通.com (@famitsu) September 13, 2023

係，我知，麻雀Game好多年前已經有，我識唔少人仲係喺Yahoo!麻雀上面學打牌，坊間亦有大量代替品，但一般嘅麻雀遊戲通常都會大幅簡化個打牌過程，至少大家係需要自己洗牌疊牌。而「手積み麻雀」嘅特別之處，就係刻意「化簡為繁」，玩家打完一鋪真係要自己洗牌疊牌，遊戲會用物理引擎實時演算出每一隻牌嘅動向，雖然並非完全手動 (例如打出依然只需按一下滑鼠)，但比起其他麻雀Game已經保留更多過程，介面亦非常簡潔，再配合埋洗牌嘅「啪啪聲」令整個打牌體驗更加完整！

「手積み麻雀」目前預計於2023年內喺Steam平台上推出，可以單人遊玩外亦可以約埋朋友網上對戰。不過目前只支援日文，相信亦只會有日麻玩法，打開廣東牌嘅朋友可能要等往後更新。但你試想下，喺不久嘅將來，你或者就可以戴住VR裝置安坐家中，同朋友一齊親手打牌、洗牌、疊牌、吹水，呢啲咪就係科技帶來嘅好處囉！

資料來源：Steam