有「日本Grammys」之稱嘅《第62屆日本唱片大賞》頒獎典禮琴晚舉行，因為疫情關係轉為直播形式進行而且冇現場觀眾。而「動漫歌姬」LiSA就憑住《鬼滅之刃劇場版 無限列車篇》嘅主題曲《炎》，打敗三浦大知、AKB48、乃木坂46等入圍歌手，以大熱姿態獲得最高榮譽嘅2020年度大獎！攞走大賞嘅動漫主題曲少之又少，而今年都係LiSA出道十年嚟第一次入圍《日本唱片大賞》，估唔到第一次入圍就攞走大賞咁開心。

出道十年嘅LiSA演唱過唔少動漫主題曲，相信唔少動漫迷都對佢非常熟悉，而上年佢就因為一人承包動漫《鬼滅之刃》嘅片頭加片尾曲而人氣急升，晉身日本天后級女歌手。而《炎》除咗今次獲得大賞之外，亦連續11個禮拜係日本Oricon數碼單曲榜居首位，取代米津玄師代表作《Lemon》十個禮拜嘅紀錄，成為史上保持首位最長時間嘅歌。近日喺Youtube嘅MV瀏覽量仲突破一億次，簡直係喜事連連。 

《炎》MV喺youtube突破1一億個view

而LiSA上年推出嘅《鬼滅之刃》（動漫版）OP《紅蓮華》亦喺今年累計超過100 萬次下載次數，正式獲得日本唱片協會認證為「百萬」單曲唱片，更加令佢成為日本史上第一位獲得呢個成就嘅女歌手，LiSA簡直可以話係今年日本歌壇嘅大贏家！