Samsung 於昨晚正式推出全新 Galaxy Note 10 系列智能手機，不過今次嘅發布有別於以往 Note 系列，因為 Samsung 分別推出咗「一大一細」嘅 Note 10 及 Note 10+ 機型，兩款機都係用上咗與 S10 一樣嘅「開窿」螢幕設計 Infinity-O。而 Note 10 另一焦點就一定係配備新功能嘅 S Pen，佢加入咗6軸陀螺儀，可以偵測用家利用 S Pen 上下左右移動及打圈手勢，好似魔杖咁指揮手機。

噚晚香港嘅零晨時間，Samsung 於美國紐約發佈咗全新 Galaxy Note 10 系列智能手機，不過今次 Samsung 打破咗舊有傳統，分別推出咗6.3吋嘅 Note 10，及Note 系列有史以來最大螢幕嘅6.8吋 Note 10+。呢部最大嘅 Note 10+ 螢幕佔比達94.2%，解像度為 3040 x 1440 (498ppi)；而較細嘅 Note 10 螢幕佔比達93.7%，解像度為 2280X1080 (401ppi)。

Samsung 指出，今次新推出嘅大 Size Note 10+ 主要係針對 Note 系列忠實 Fans，所以 10+ 用上咗更大螢幕、更高效能、及更智慧電池；而細 Size 嘅 Note 10 就希望拓展新消費群，配備與 Note 10+ 相同嘅 S Pen 及處理器規格，但機身就更輕巧。

S Pen 方面，佢加入嘅新功能與 Samsung 平板電腦 Galaxy Tab S6 一樣，喺觸控筆中加入咗6軸陀螺儀及加速感應器，令用家可以用「手勢」嚟「指揮」手機，例如利用 S Pen 隔空向上揮動來切換相機，向左右揮動切換拍照模式、或者係順時針/逆時針畫弧形來放大縮小，就好似電影《哈利波特》嘅魔杖咁使用。

除此之外，喺 Note 10 上以 S Pen 手抄嘅筆跡可以轉化成數碼文字，唔止英文，中文都一樣得！以往 Note 系列手機嘅文件只可以導出 PDF 等格式，而今次 Samsung 就喺 Note 10 中支援導出 Microsoft Word 檔格式，大大增加 Note 10 嘅商務實用性。

其他規格方面，Note 10 及 Note 10+ 嘅相機配置分別不大，主鏡頭都係用上 12MP 標準鏡頭、16MP 超廣角鏡頭及 12MP 遠攝鏡頭組合，不過 Note 10+ 就額外多咗一組 TOF 鏡頭；而前置相機均用上 10MP 鏡頭。電池方面，Note 10+ 搭載較大嘅 4300mAh 電池，支援高達 45W 有線快充；而 Note 10 則配置 3500mA 電池，支援 25W 有線快充，而兩款機均支援可雙向充電無線充電功能。

Galaxy Note 10 及 Galaxy Note 10+ 將於8月23日推出幻光、幻黑及 幻白版本，Note 10 售價為 US$950 起，而 Note 10+ 則由 US$1,100 起，香港推出時間及售價尚未公布。